O le i ai i Samoa o Sui o le Mālō o Amerika Samoa, na maua ai le avanoa e feiloa’i atu ai i le afioga i le Palemia, Susuga i le La’aulialemalietoa Leuatea Polāta’ivao Fosi Schmidt.

O lea aumalaga, sa ta’ita’ia mai e le Fa’auluuluga o le A.S.T.C.A. iā Folasāitu Sorepa Fata Thomas fa’apea le Fa’auluuluga o le Ofisa o le Kovana a Amerika Samoa iā Leonard Seumanutafa ma Sui o le Mālō o Tutuila ma Manu’a, fa’atasi ai ma le Konesula o Samoa i Amerika Samoa iā Fata Leausa Brian Kaio.

O le fa’amoemoe autū o lenei feiloā’iga, se’i soālaupule ma fefa’asoaa’i, i auala e fa’amautū, fa’afaigofie ma galulue fa’atasi ai Samoa na lua, i le unā’ia o le lelei atoatoa ma le mauāluga maoa’e o auaunaga tau feso’otā’iga fa’aneionapo i Samoa fa’apea ai ma Amerika Samoa.

Na talia fiafia e le afioga i le Palemia lea sāvali, i le agaga mauāluga, ia matuā lelei atoatoa feso’otā’iga fa’aneionapo i le aga’i atu i le lumana’i, ma ia fa’atumauina pea le galulue fa’atasi ma le fe’oe’oea’i o Samoa na lua i so’o se auaunaga e manuia ai ma malu puipuia ai atunu’u e lua.