O lea ua to’a i le Nofoalii o le Atua le viiga ma le faafetai e pei ona osia e le paia o Faafeagaiga o lo tatou afioaga. Ua taliga foi e fia faalogo le malelega a le afioga i le Tamaaiga, le Tui Atua e toe faatepa lenei sauniga i le afuaaga o le Mau, ma le taua o le maota lenei ma le laueleele i le talafaasolopito o le sailiga malo a le atunuu. Ua ose taotoga iasā lenei taeao, a oni ufi e tutupu mauli ma lagona pe toe tomanatu i le soifua faitaulaga o nai o tatou tuaā.

Ou te muai ta le to’o tavai, ma ou fa’apoi laau tuvanu aua le paia o le tupua, o maota ma malaefono, o le fanua ma lona tapuafanua. Tulouna Vaiala, o le maota e afio ai le Tamaalefale, lau afioga Mataia. E afio ai le Matua o Patauave ma le Usoalii. Ua mamalu foi Tauavasa ma Malae, e alalatai ai Une ma Manuleleua, ma le mamalu i le Aogamalie ma le faleagafulu.

Ua paia foi Lepea ma Vaitagutu. E afio ai le afioga i le Tupufia i le Faumuina. Afifio ai Usoalii ma Tamapaa. Afio ai Letele ma Tanealevao ma Leota. Maliu mai le Nofoasa. E faapea le Tauaitu ma le Saofaiga a Atua.

A o paia o Faleata, aua le afifio o Tapaau ma Tamaalefale. Susu ai le Alo o le Malietoa. Maliu mai le Toafa. E faapea le Puletua ma le Faiga, ma le Nofoapule ma upu ia te oe Faleata. O paia ia, o sa ma faiga, o lea ua popo i Vaiala nei.

Ae matua le tu’u i le paia o faafeagaiga o loo punoua’i i le feau ma le Talalelei i lo tatou Nu’u ma le Itumalo.

Ou te faatalofa atu foi i lau afioga i le Taitaifono o le Fono Faavae o Faleata 1, lau Tofa Manuleleua.

Ou te faatulou atu foi i paia faalemalo. I le afio o lau afioga i le Ao Mamalu o le Malo ma le Masiofo. Afifio Sui o le Fono a Sui Tofia, Le Sui Palemia ma le Kapeneta, Le Fofoga Fetalai ma le Palemene. E faapea le Faamasino Sili ma le paia o le Faamasinoga.

O paia o Samoa i ona tulaga faalupe, ou te manatu o lea ua maea ona tapena ma mamanu faavala lautele e le Fofoga o le aso. Ona manatu lea, taalolo paia o le atunuu.

A o le aso, o lea ua failā tu i ama, ma ua tapisa le gataifale ae faailo le fuifui o tuamafa filimalae ua toto i tialuluga, auā le galuega sa gapatia ai lo tatou afioaga nei. A o faiva sa poupou ma afaafa e le afioga i le Agaiotupu ma le falefa o lona aiga. O lea ua tau lau o le faamoemoe, ua o tatou tepa ai i ula, ma tagai i ula, ua futifuti-a-manuula. Le galuega ua maea.

O le fale ma lona anofale, o le maota ma lona paepae e faamanatu ai le gafa, ma lagisoifua o le sailimalo. E faapena lagona o lenei taeao, i le toe fausia ai o le Ofisa o le Mau, i ona foliga sa muai fausia ai i le 1927 ina ua faatuina lona Ofisa i le fanua lenei,ma lona uluai Failautusi, le afioga iā Mata’utia Karauna. O iinei na tapuvaetasi i ai galuega a le Mau a Samoa, ma molimau i le taupati mai o le atunuu e lalago le anava o le sailigamalo a Samoa – ‘O Samoa mo Samoa’.

Talofa e, i nai o tatou tuaā, e le’i gasē, aua sa lautua le momoliina o le Mau i le filemu ma le lotomaulalo. Sa o latou tapena se Samoa e soifua saoloto ai a latou fanau. Sa o latou faitaulaga ina ia aua nei valetuulima lo tatou tofi, lo tatou atunuu. O lo latou pulunaunau lea, na faaosofia e le Agaga o le Atua, ua mafua ai ona tatou sapi i maa o malie, ma oaoa i Faleseu. E iai lo tatou Malo Tutoatasi, lea ua o tatou faamanatuina le 64 tausaga i lenei vaiaso.

Pe aisea e manatua le Mau a Samoa? Ae pe galo faapefea le afu toto, ma le taavao o le atunuu. Pe galo faapefea le masoe o le Tamaaiga ma Tupu ma E’e na masoe faatasi ai i le Aso Toonai pogisa. A o le faufauina o le mau e momoli i Malo Aufaatasi ma le lototele. O lea ua tali atoa le 100 tausaga le faatuina o le Ofisa o le Mau i Vaimoso nei, ae o loo olaola pea i o tatou loto le faiga taulaga a o tatou tuaā.

O le mea lea e fai ai au ma Sui o le tatou Malo ma le atunuu, e momoli atu le faafetai tele i le paia o le afioaga ma le Itumalo o Faleata 1, i le a’e ai o la outou tofa ma le faautaga e toe fausia lenei maota. E fai ma faamanatu mo o tatou tupulaga, aemaise fanau lalovaoa a Samoa i le faatauaina o lo tatou saolotoga, aemaise la tatou tautua i a Samoa. Ae sili lo tatou faafetai ma viia le Atua, aua o ia ua o tatou maua ai le tofi o Samoa le atunuu pele.

Ia avea lenei fale, ma toaiga o sailiiliga o mataupu tau i le tala faasolopito, aemaise le solo maimoa mai o i latou e malaga tafafao mai i Samoa. O se aseta e faamanatu mai ai pea le sailimalo ma le faatuatua o o tatou matua. Tau ina ia tautalaaso pea, ma ia faaauau ona fuga matagofie le faamoemoe e tasi, tatou te tuli faatasi i luma le ‘ai o le tapuaiga a Samoa mo nei ma le lumanai.

Ia faamanuia le Atua i lenei galuega. Ia faamanuia le Atua i le paia i tapaau o le afioaga. Ia soifua manuia auauna a le Atua. Ia faautuutu pea le atu-a-fetalai i tulatoa ma le nofo-a-faleupolu. E faapea fuaga o lalovaoa.

Ia manuia le faamanatuina o le 64 tausaga o le Malo Tutoatasi o Samoa.

Soifua.