Lau Susuga le Taitai o le Sauniga, Rev. Pita Toleafoa.

Lau Afioga le Minisita o A’oga ma Aganuu, Hon. Aiono Dr Alec Ekeroma

Le pa’ia o Sui o le Malo, Malo Fa’aaloalogia, ma le pa’ia maualuga o le Auvala’aulia.

Le Komiti o le A’oga e ala i le Fonofaavae o le tatou Itumalo.

Le Asosi o Matua ma Faiaoga.

Le Asiasi aoga, Puleaoga ma le Aiga Faiaoga.

Faapea le Laumua o le Kolisi o Vaimauga.

Malo le soifua maua. Malo le soifua lagi matafi.

Ou te taofi ua mae’a ona ‘apo’apo le vaisinasina nai Utu’ofu pei o le tala i le nuu o Asulu. Ua mae’a foi ona faataitafola le tai o le Tuamasaga e ala i lo tatou va tapuia ma le Atua Silisili ese. O lea sa fītā ma feagai i ai lana auauna sei faatō manū o le taeao ma faamanuia lenei galuega tele. Tau ia o se fatu e pa’u i se ele’ele lelei le fe’au fa’aleagaga ma le upu o le ola auā lenei galuega ua tatou molimauina. O le tatalo, ia osaosa le tofa pa’ia e ala i le faasoa a le lagi, ia tapua’aoina ai pea le soifua auauna aua le Atua ma lona finagalo. Ia faafoi atu le mau ma ia faamanuia le Atua i lau susuga le Faafeagaiga.

Ua mae’a ona fola le leifanua ma fa’ae’e le i’alautua i le taumua e ala i pa’ia o lenei aso pei ona saunoa le Fofoga o le aso. Ae ao pea ona fa’atulou i Faatoialemanū, Tapuotaota ma Laloniue. O maota e afio ai le Matua ia Tofaeono ma Tama ia Asi ma Patu. Ae matua le tuu i Falefatu o le malae e etetasi iai upu aua Tupu ma Tootoo o le Fale-Vaimauga. Ae tausi ma puipui e La’ua na Ta’i; o Tamapua ma Manogiamanu ma le mamalu le Nofo-a-ituaiga ia Fuata.

O le vala’aulia ai o le Malo e fai se tala aua lenei galuega tele, o se vala’au fa’aaloalo. Faafetai tele mo le avanoa e fai ai se leo o le tatou Malo aua lenei faamoemoe ua taunuu. O le upu moni, o loo logaloga lava i le malae o le Laumua nei le ulua’i o’o mai o le Malo e tauaofia faatasi ma faiaoga uma o Samoa i le aso 23 Tesema 2025. O le fa’ailoga lena o le maualuga o le va’ava’ai ma le silasila a le Malo i le fa’atāuaina o a’oa’oga.

E tāua tele i le tatou Malo le mautinoa o le atina’e uma o vaega moomia ina ia siitia ma fa’aleleia taunuuga o a’oa’oga a le fanau. O le fa’aolooloma’au a le tatou Malo, ia tatou galulue fa’atasi, tu’u mai lo outou tau’au, avatu le tau’au o le tatou Malo, tatou tausoa faatasi ma galulue faatasi, ina ia mautinoa se Samoa e atamamai ma popoto ana fanau mo taeao ma le lumana’i.

Mo le silafia, o lea foi ua mae’a ona faasolo polokalame mo le faalauiloaina o le Taiala mo le Lumanai Manuia o Samoa mo lenei Tausaga Faaletupe 2026-2027, i le Va’aiga Taula’i: O se Samoa e maua’a lona Fa’avae i le Atua ma lana Aganu’u, e mafai ona ausia se tulaga mausali, saogalemu ma manuia mo ona tagatanu’u uma. Ma o lo’o fa’ataua ai i le Vaega Fa’amuamua 2 o le Ta’iala e faapea: A’oa’oga ma le Aganu’u. O le ta’utinoga lena o lo’o malosi lava ma maualuga le va’ai a le Malo, ia lelei ma anoa le atina’eina o a’oa’oga ma ia ō gatasi ma le puipuia o tatou tu ma aganuu mamalu mo le lumana’i.

Ua o gatasi lelei ma le auga o aute o lenei taeao, o le tatalaina o le maota mo le a’oa’oina o le Gagana Samoa aemaise o Tu ma Aganuu. O se matāti’a lelei tele lenei mo le fa’amalosia ma le atina’eina o le tatou gagana Samoa ma tatou tu ma aganuu mamalu. Ia faaolaola, aputiputi, faasao ma faafailele pea, aua o lo tatou tofi lea mai le Atua. O lea foi ua taoto lua le seuga e ala i le faalauiloaina o galuega o loo faatinoina i mataupu taitasi – o mataupu Tusiata, Faa-Pisinisi, Faasaienisi faapea ma le Faamatata Ese’ese. O tomai ma agava’a nei, ua moomia tele ma e telē lona aogā i le atina’eina o Samoa.

Momoli le faafetai ia i latou sa fesoasoani, lagolago ma foa’i i le fausiaina o lenei galuega. O lo outou tamaoaiga ua foa’i ma a’ao iai i soo se auala, o lea ua tino ai le tatalo a le tatou Laumua i lenei taeao. E le puaoa le lagi o faamanuiaga i lo outou a’ao alofa ma le agalelei ua tele.

Faamalo i le Komiti faapea le PTA. Faafetai i le lagolagosua a Matua. Faamalo ma faafetai i le tatou Itumalo. E ui lava o loo i Vaimauga 2 le Kolisi, ae talitonu lava o loo togisao uma le Falevaimauga i le tatou Kolisi. Malo tautua.

Faafetai i le Matuaofaiva ma le Falefa Aiga Sa Lemalama, o lo outou a’ao mae’ae’a ma le lē faalogologotiga – a lea ua tu le faila. Malo galulue. Malo onosai. E tele lu’itau ae manatu lava sa to’o lava i le Atua, e mālū ai le vai auā faigata o le galuega.

Malo faafetai i le Asiasiaoga, le Puleaoga ma le Aiga Faiaoga. Malo tautua. Faafetai mo le auaunaga. E ui lava ina i ai isi taimi e fotua’i mai ai fa’afatiatama’i e tutupu i amioga a le fanau ona o le laumeatoenuti ma le laufa le ainā, ae o loo outou galulue punoua’i lava. Malo galulue.

Fanau aoga o le tatou Laumua – ua tele lu’itau o le olaga ua aafia ai outou le fanau. E leai se isi apoapoa’i sili, ia tete’e atu i fuāla’au faasaina. Auā e ogaoga aafiaga o le auai ma militino faatasi ma tagata o lo’o faia nei faiga le alofa. O le iuga lava, o Tanumalala, ona maimau ai lea o le ola.

Ia to’a’aga le aoga ma finafinau. Ia outou ola tausiniō ma fa’amoemoe i le Atua. Ia tautuana ma outou lenei galuega tele, tausolomua mai ia outou le faamama, faamatagofie, teuteu ma ia ‘aua le tusitusia. Aua o le faamoemoe o lenei fale, e mo le a’oa’oina o au tu ma aganuu ma le gagana Samoa. O lona uiga, e a’o ai le amio pulea, le tauāgafau, le amio sōlia, le āva, ma le tausia o le va fealoaloa’i. Ia aogā lenei galuega ma ia tele ni ta’itai iloga e faavae mai i lenei atina’e tāua ma lelei.

O le a foi le leo o le Malo, o le tatalo, ia tatou galulue faatasi. E le toe tau fa’ailoina le ogaoga o a’afiaga ua iai Samoa ona o fuala’au fa’asaina ma ua aafia ai ma fanau. Peita’i, o lenei tauiviga e tete’e atu i fuala’au faasaina, e le o se matafaioi a se tagata se to’atasi poo na’o le Malo, ae o le matafaioi a tatou uma – o aiga, a’oga, ekalesia, nu’u ma le atunu’u atoa. O le talitonuga mautu, a tatou tutū faatasi, e leai se avanoa e manumalo ai fuala’au faasaina.

Ia faamanuia tele le Atua i lenei galuega. Ia tumau le malamalama ma ātaāta o manuia o lona agalelei faasoa, i luga o faiaoga o le a faaaogaina lenei fale, aemaise alo ma fanau o le tatou Laumua.

A tatala le filitasi nai le Tuamasaga ma ta’ape lenei aofia, tulimuli’au e le Agaga o le Atua. Manuia lana aufaigaluega galulue i soo se Fatafaitaulaga. Manū faaifo mai lagi auā le Komiti ma le tatou Laumua. Manuia le tatou Malo.

Ma e fa’asilasila fa’aaloalo atu ai, ua tatala aloaia lenei galuega mo lona fa’aaogaina, aemaise o galuega faatino a le fanau i nisi o mata’upu a’oa’oina.

Faamanuia tele le Atua.

Soifua.