O lea ua mae’a ona o tatou faasifo ma faaoloolomaau i le Atua soifua, mo ana faamanuiaga e tusa o lenei aso ma lona faamoemoe.

2. O outou paia, sā ma faigata, nuunuu atu ia faatini o tausala, e le gafatia i sa matou tala, aua o Samoa o le atunuu tofi, o outou paia e mai le vavau seia oo i le faavavau.

3. Ae avea ia lenei itula, se’i o’u mua’i ave atu se fa’amālō ma se faamanuia, e fai ai ma sui o le alii Palemia, le Kapeneta ma le tatou Malo, i ō outou tofiga faa faatonu. Faafetai mo le tuuina mai o lo outou tauau, e fia tautua mo lo tatou Malo aemaise le atunuu i avanoa faa faatonu mo ana Faalapotopotoga. O le faatuatuaga foi a le tatou Malo mo a outou susuga i Faatonu, tatou te folau faatasi ai ma le faatuatua, ma le mautinoa, o lo tatou sao i Faalapotopotoga, e mo le manuia o lo tatou atunuu ma nai o tatou tagata. O lo o lalago faatasi lava lo outou valaauina, ma le vaaiga taula’i o le tatou Taiala mo le lumana’i manuia o Samoa 2026/27-2030/31e faapea “O se Samoa e maua’a lona Faavae i le Atua ma lana Aganu’u, e mafai ona ausia se taulaga mausali, saogalemu ma manuia ona tagatanuu uma”

4. E le tau faailoaina le taua tele o Faalapotopotoga i le atina’eina o le atunuu. O ana auaunaga e faamoemoe i ai le atunuu mo le soifua manuia. E moomia la auaunaga ia lelei i taimi uma, o iina e taoto ai se faamamafa a galuega faa faatonu ina ia mautinoa, e faatino sini autu a Faalapotopotoga e tusa ai ma ana Tulafono aemaise Faiga Faavae a lo tatou Malo. O tatou anava tau lena e upogi ai sini autu o pulega lelei, ia unai’a pulega lelei, faataua avanoa tutusa, ma galulue faatasi faapaaga.

5. O le faamoemoe o a’u o le Minisita o Faalapotopotoga, lea foi e alala atu la tatou Komiti na fita i tuga ma le iloiloina o a outou tusi talosaga, aemaise le tatou Matagaluega o Faalapotopotoga a le Malo (MPE), ina ia faatino le auaunaga moomia e lo tatou atunuu. O le sini autu foi lena na tapena agai iai le tatou Tala Faatatau Autu o le Tupe mo lenei Tausaga faa le tupe ua tatou savalia (TF2026/27) O AIGA – ina ia iai le autasiga ia i tatou i le gafataulimaina o atina’e. O atina’e e faamoemoe iai le faatupulaia o le tatou tamaoaiga, ae a faatamala ma le fesoota’i ona fuafuaga ma le mata’ituina lelei o taunuuga o galuega, e feagai lo tatou atunuu, aemaise o tatou tagata lautele, ma puapuaga.

O lea le mamalu o Faatonu, ia teu fatu i o outou finagalo, o le manuia lautele o lo tatou atunuu, ma le gafataulimaina o tatou atina’e, o lo o taoto atu i outou aao. Afai foi o oe o se Faatonu mo a tatou Faalapotopotoga Tau Fefaatauaiga, ia e nofo silafia, o lo o tapua’i atu le Malo I outou faiva, a iai ni tupe faasili, totogi mai le Dividend, o lea e tele lava isi tatou atina’e o lo o fia faatinoina. O le vaai maualuga, ina ia mafai lava e tatou, ona faatupe a tatou atinae i le lumana’i, pe a mausali faiga Faavae e lima taitaiina ai galuega a tatou Komiti Faatonu, o Pulega ma Faalapotopotoga taitasi.

6. A silasila i le tatou Taiala o le Lumanai Manuia o Samoa 2026/27-2030/31 e 5 a Taiala Autu, a o totonu o na taiala autu, e fai saofagā uma iai faalapotopotoga a le Malo, mai le soifua maloloina lautele, i aoaoga, o le faamautuina o le tamaoaiga aemaise le faa agavaaina o nuu ma alalafaga I tua, o le faatupulaia o atina’e eseese, o le puipuiga o le siosiomaga, aemaise le tausia lelei o aseta a le Malo. O vaega laulautetele ia o le atina’e o le tatou atunuu lea o lo o iai auauna a tatou Faalapotopotoga. O lona uiga, e matua’i taua lava la outou pito laau faa Komiti Faatonu, ina ia mautinoa, o auaunaga o lo o tuuina atu e tatou Faalapotopotoga ua outou seei ai, o lo o lalaga faatasi ma fuafuaga a le tatou Malo.

7. E le faigofie la outou pito laau aua e eseese uma Faalapotopotoga ma a latou matafaioi faa le Tulafono, o loo iai foi matafaioi a isi Minisita (Line Ministers) e aafia ai galuega a Faalapotopotoga i vaaaiga faa Sector poo le fola o Vaega Maoti.

8. O le faatalauula atu ina ia outou afifio mai i lenei taeao, sei tatou aleaga faatasi, ma fola manino atu se naunautaiga o le Malo na ala ai ona tuuina atu lo latou faatuatuaga atoatoa ia te outou i tofiga ua outou pale mai ai. O le aoaoga faamasani i lenei taeao o le a faamanino atu ai matafaioi a le Faatonu e tusa ma Tulafono mo Faalapotopotoga a le Malo 2001,faatasi ai ma Faiga Faavae e lima taitaiina ai galuega faa Faatonu.

9. O la matou tatalo, ia outou faatonufolau ma le amiotonu, faatonufolau i luga o pulega lelei (principles of good governance) ia atagia i faaiuga fai i totonu o Komiti Faatonu le mulimulitaia o Tulafono ma Faiga Faavae ua faataoto e le Malo mo ana Faalapotopotoga ma ana atina a’e tetele.

10. O le lu’itau mo a outou susuga, ia manatua lo outou valaauina. E le o se ala faigofie la tatou savaliga i le tele o mataupu ma’ale’ale e aafia ai Faalapotopotoga ua avea ai outou ma Faatonu. Ae ia tulimata’i pea le anavatau na faatuina ai e le Malo ana Faalapotopotoga, ina ia tuuina atu auaunaga e sili atu ona lelei, ma fesoasoani i le Malo mo le faatupeina o ana atina’e tetele.

11. Agalelei mai le Atua i lo outou valaauina, maua la outou tofa ma le uta, e fesoasoani ai i Ofisa Sili ma Pulega a Faalapotopotoga ina ia ausia taunuuga sili atu ona lelei ma ia faamalieina foi lo tatou atunuu i auaunaga tuuina atu.

Soifua ma ia manuia.